Këshilli i Kosovës për Trashëgimi Kulturore (KKTK) është anëtarësuar në NEMO – Network of European Museum Organisations, duke krijuar mundësi të reja për shkëmbim profesional, bashkëpunim ndërkombëtar dhe përfshirje në iniciativa e projekte të përbashkëta evropiane.
Në kuadër të pjesëmarrjes në Konferencën Vjetore Evropiane të NEMO-s që u mbajt në Vilnius të Lituanisë, nga 11 deri më 13 tetor 2026, kryetari i KKTK-së, Artan Krasniqi, së bashku me përfaqësues institucionalë, zhvilloi një takim me znj. Julia Pagel, Sekretare e Përgjithshme e NEMO-s.
Takimi shërbeu si mundësi për të diskutuar perspektivat e bashkëpunimit ndërmjet KKTK-së dhe NEMO-s, me theks të veçantë në shkëmbimin e përvojave profesionale, avancimin e praktikave institucionale dhe krijimin e mundësive për bashkëpunim me organizata dhe profesionistët evropianë të sektorit të trashëgimisë kulturore.
Konferenca me temën “Human after all – Museums in the wake of AI”, mblodhi 330 pjesëmarrës nga 41 shtete dhe trajtoi zhvillimet dhe ndikimin e inteligjencës artificiale e transformimit digjital në institucionet kulturore, sigurinë kibernetike, etikën, besimin e publikut dhe rolin e institucioneve qeverisëse të fushës së trashëgimisë kulturore në një shoqëri në ndryshim të vazhdueshëm. Këto tema hapin perspektiva të rëndësishme edhe për reflektimin mbi mënyrat se si institucionet e trashëgimisë kulturore mund të përfitojnë nga teknologjitë e reja, duke ruajtur në qendër vlerat njerëzore dhe mbrojtjen e trashëgimisë.
Pjesëmarrja në këtë konferencë dhe takimi me drejtuesen e NEMO-s përbëjnë një mundësi për forcimin e lidhjeve ndërkombëtare, rrjetëzimi e zgjerimin e shkëmbimit të njohurive dhe identifikimin e fushave konkrete të bashkëpunimit në funksion të zhvillimit profesional dhe institucional. Nga KKTK, në konferencë morën pjesë edhe anëtarët Besarta Reçica dhe Fahri Sheqiri, si dhe Drejtori i Përgjithshëm, Kreshnik Bajraktari.
